‘O MARE
‘O mare è n’eterno nammurato.
Isso ruffiano, m’arravoglia cu l’onne,
me stupetèa ‘e carezze appassiunate
e dint’a l’abisse suoje, me tire nfunne.
Primme me cunnulèa comme ‘na varchetella:
tra cielo e mmare me porte p’ ‘a mano,
po’ antrasatte s’apprufitta ca so’ piccerella
e fa ‘o padrone purtànneme luntano.
Si po’ s’aiza comme ‘na muntagna
e me se schianta ncuolle pe’ me fa’ paura
m’avvilisco impotente e me rassegno
pensanno d’essere paguro stella
medusa riccio o siccitella.
Io m’abbandono e me faccio purtà
cu l’uocchie nchiuse a ccà e a llà…
e pare ca zittu zittu ‘o sento ‘e murmulià…
chisà che dice…cu chell’onne chiare…
forse pur’isso infelice, tene turmiente amare?
Pirciò se sbatte e allucca nfaccia ‘e scoglie?
Ma sempe a me, me vene ‘a voglia
e lo guardà pe’ la bellezza rara!
Quanno pazzèa e se mbruscina cu l’evera verde,
dint’ ‘a ‘stu ballo mo doce e mo sfrenato
l’anema mia sbattuta e nammurata,
se sperde…
23 agosto 2009-Lili
La vita è come il mare: quando c'è tempesta confortati al pensiero
che presto ritornerà il sereno.Lili
